Hanglip-trofee bly op eie bodem

Date: 15 July 2016 By: Isabel Venter

Louis Trichardt se plaaslike gholfspelers het hierdie jaar gesorg dat die gesogte Hanglip 54-trofee sy staanplek terugkry in die trofeekas van die Soutpansberg Gholfklub.

Marnus Leeb, alhoewel hy deesdae ‘n Pretorianer is, het as ‘n ingeskrewe lid van die plaaslike klub weggestap met die gesogte trofee. Die Soutpansberg Gholfklub het die afgelope naweek vir die 23ste agtereenvolgende jaar gasheer gespeel vir die Hanglip-toernooi, met Imperial GM Louis Trichardt as hoofborg.

Marnus het tydens die drie dae se spel altesaam 112 individuele Stableford-punte aangeteken om sy eerste plek te verseker. Oor die drie dae het spelers in spanne van twee daagliks deelgeneem, maar elkeen se individuele Stableford-telling is gebruik om 'n algehele wenner ná die derde dag te bepaal.

Wat die ander individuele uitslae betref, was Flippie Greyling van Louis Trichardt algeheel tweede met 111 punte en Jaco Froneman van Pretoria derde met 108 punte.

Louis Trichardt se 26 spelers, oftewel ‘perde’, het hulle eweknieë van die Klerksdorp Gholfklub oortuigend geklop. Daar is elke jaar groot kompetisie tussen dié klubs, soveel so dat daar al spesiaal ‘n trofee laat maak is. Hierdie jaar het Soutpansberg die beker gewen met ‘n totaal van 2 490 individuele Stableford punte, terwyl Klerksdorp die aftog moes blaas met ‘n telling van 2 418.

Wat die daaglikse kompetisies betref, is die eerste dag se spel gewen deur die Soutpansberg Gholfklub se president, Arie Steyn, en spanmaat, Flippie Greyling, met 48 punte. Rhyno Gerber en Brink Schlesinger was tweede met 47 punte en Bruce du Toit en L. Penzeler was derde met 46 punte op ‘n uittel.

Dag twee se spel is gewen deur Bruce en Pieter du Toit met 46 punte op ‘n uittel, gevolg deur A. du Plessis en Kobus Barkhuizen (junior) in die tweede plek, ook met 46 punte. A. Booyens en D. Swart was derde met 45 punte op ‘n uittel.

Saterdag en derde dag se spel is gewen deur die klubkaptein en president van die plaaslike klub, Lappies Labuschagne, en Arie Steyn met 47 punte op ‘n uittel. A. Rheeder en T. van Tonder was tweede, ook met 47 punte, gevolg deur Marnus en Anrich Leeb in die derde plek, ook met 47 punte op ‘n uittel.

Die Soutpansberg Gholfklub het ná afloop van die toernooi die volgende borge bedank vir hul bydraes en ondersteuning: Driepunt Elektries, Trio Pompe, Mauritz Senekal, Sandberg Vervoer, Raymond’s Glass, Africa Hardware, Bennie Smith, PG Glass, Macridge Farms, NTK Louis Trichardt, Tjol Jandrell, PJ Timbers, Louis Trichardt Lodge, Madi Tanks, PSG Konsult, Kumu Plant Hire, S&S Bande, Bridge Auto, Promo Place, Coca-Cola Fortune, SAB Millers Makhado, KB Struktureel, André Bothma, BB Mount Fuji, Speedbrake, Brake & Clutch, LTT Bolt & Nut, Vleismark Slaghuis, Vhavenda Bricks, Pro Shop Pretoria, Comien Veggies, Ayob Motors, Amakozi Tuindienste, Bosveld Trailors, Levubu Bande, Floors van Wyk, Springfield Farms, Percy Anderson, Marius Mostert, LTT Scrap Metals en Eqstra.

Viewed: 1061

Isabel Venter

Isabel joined the Zoutpansberger and Limpopo Mirror in 2009 as a reporter. She holds a BA Degree in Communication Sciences from the University of South Africa. Her beat is mainly crime and court reporting.

More photos... 

Soutpansberg Gholfklub se spelers het van dag een af gewys hulle is ernstig oor 'n wen in die Hanglip 54-toernooi. Donderdag se spel is gewen deur Arie Steyn (klub president) en Flippie Greyling met 48 punte. Van links na regs is Arie, klubkaptein Lappies Labuschagne en Flippie.

Dag twee, oftewel Vrydag, se wenners van die Hanglip-toernooi was Pieter en Bruce du Toit met 46 punte op 'n uittel. Van links na regs is Pieter, Bruce en die Soutpansberg Gholfklubkaptein Lappies Labuschagne.

Saterdag se kompetisie is gewen deur die Soutpansberg Ghofklub se president, Arie Steyn (links) en klubkaptein Lappies Labuschagne met 47 punte op 'n uitel.

Die twee Lappiese van die Soutpansberg en Klerksdorp Gholfklubs. Soutpansberg se 26 spelers, oftewel ‘perde’, het hulle eweknieë van Klerksdorp oortuigend geklop met 2 490 punte teenoor Klerksdorp se 2 418 punte en derhalwe die trofee gewen wat jaarliks tussen die twee klubs tydens die Hanglip 54-toernooi op die spel is.